من الأسافير – بنكك … بنكك …. بنكك
محمد يوسف مستر – مهندس برمجيات
واحد من اول التطبيقات الخلت شريحة كبيرة من المجتمع بالذات التجار انهم يقتنوا هواتف ذكية، وكان واحد من اسباب من انتشار إستخدام التقنية في السودان، المشكلة الحالية في التطبيق “واللي ما عملوا ليها حسابك من بدري واللي صعب جدا تتحل في زمن قصير تعالوا نشوف المشكلة”
انا استخدمت التطبيق اكثر من ثلاثة سنين، الوقت داك كانت الإجراءات ساهلة جدا وسريعة وانا في نفس اليوم فتحت الحساب وفعلت التطبيق بس حاليا لو داير تطلع جواز اهون من انك تفتح حساب ببنك الخرطوم والسبب انو الناس دايرة تشتغل بالتطبيق.
العامل الأساسي في إنتشار التطبيق هو التضخم وسهولة المعاملة فما ممكن انا اشيل قروش او بالأحرى ورق كتير واحتمال استعمل شنطة او كيس عشان اشتري حاجه دا غير العد والقروش المقطعة والمزورة…. الخ
فنجد انو (بنكك) كان سابق بنوك كتير في فكرة التطبيق وبقا السائد في أغلب المحلات التجارية والمعاملات العامة والسؤال دايما “كاش ولا بنكك”.
دا كلو كان تمهيد لسبب المشكلة الحالية وال(هي) تعطل التطبيق في بعض الأحيان والبطء الملحوظ جدا المشكلة في تقنيا نحن بنسميها في مجال البرمجيات بمشكلة ال deadlock او بالعربي هي الطريق المسدود
عشان تفهم معاي المشكلة عاين للصورة تحت بتجد مجموعة كبيرة من الاشخاص محتاجة تتجاوز نفس الكبرى ومافي طريقة الا الكبرى لأنو الوحيد ومافي طريق بديلة، كويس حلو ودا علاقتو شنو بنكك اقول ليك انو بنكك عندو نفس الإشكالية، عشان انت تأخد خدمة من التطبيق سواء تحويل او شراء كهرباء او شحن رصيد… الخ انت لازم تقطع الكبرى في كل خدمة عشان تعمل تسجيل دخول لازم تقطع الكبرى عشان تتحمل القائمة الرئيسية لازم تقطع الكبرى عشان تتنقل بين الشاشة لازم تقطع الكبرى
أتصور معاي فال Deadlock بحصل بسبب تكدس الطلبات والطريق والمخدم واحد احتمال بعد مرور زمن طويل تأخد الخدمة لا تعلق في نص الزحمة و تتقفل، إتخيل معاي هسي في مباراة واحدة من المباريات انو منفذ بتاع التذاكر بتاعك واحد وانت على الاقل عندك 50 الف مشجع في المباراة الواحدة، دا غير الحاجات التقنية
بالنسبة ال timeout request ما مضبوط وكونك تستدعي الشاشات من الخادم دي أكبر غلط ياخ انت لو أضفت خدمة جديدة اعمل ابديت خفيف الgoogle play من دون ما يحس المستخدم بالتحديث حتى بدل انت كل مرة تعمل تحديث بستدعاء الشاشات
ودا بقودنا للمشكلة الأكبر وهي مشكلة التصميم الخاطئ وعدم استعمال المعمارية المناسبة للبناء وعدم توقع عدد مستخدمي للتطبيق حقك .
بعد الكلام دا كلو نجي للسؤال حل المشكلة شنو الحل وحيد ومكلف و بحتاج زمن واحتمال يكونوا بدأوا فيهو بس ما عندي معلومة، الحل زي كأنك إكتشفتا انو أساس البيت حقك ما بتحمل ثلاثة طوابق انك تعمل upgrade كبير اي تصدر نسخة جديدة من تطبيق بنكك انت محتاج تعمل جسور جديد تانية ولازم تخلي الخدمات تقلل من استخدام الخوادم ومهما ازدات الرامات او المعالجات والعتاد عموما وانت بجسرك الواحد دا ما حتحل مشكله ودي تعتبر حبة مخدر بتزول مع الوقت و المشكلة تاني تظهر.
الdeadlock دايما بظهر بعد النظام عمرو يتجاوز ال 4 سنين مع ازدياد الداتا حقتك اللي بتجعل عملية الاستعلام زمن طويل وبرضو مع إزدياد عدد المستخدمين طلبا للخدمة، بنك الخرطوم وبنكك ما براهو بعانو من ال deadlock منتشرة في انظمة كتير بتعاني من مشكلة الاداء وما قاعدين نهتما بيها وبنركز بس على انو النظام يقوم بمهام الاساسية.
في الختام لازم ننشر ثقافة إدارة البرمجيات ومتطلباتها الغير وظيفية و ان شاء الله حيكون في دروس كتيرة جاية بخصوص الموضوع دا