◾️ ألذَّ …….. حاجة
▪️مع الظروف والتقفيل والغلاء والصفوف و(الفلول) وناس منصّة (التأثِيث) و(إسْتِعَاضَة) الثورة المسروقة بِالهبوط الناعم والمصالحة و(إِزالة) لجنة إزالة التمكين وصانعى السيولة الأمنية وتسعة طويلة والتفلتات الأمنية والأزمات ومثيرى العنصرية والنعرات !!
▪️واحد كاتب لا غاز تعمل بيهو (شاى) ولا كهرباء تشغل بيها الهيتر عشان تعمل بيهو (الشاى) لا عيش تاكلو مع كباية (الشاى) الما قدرت تعملا عشان مافى غاز والكهرباء قاطعة و(الفَحَم) كِمِل، الناس تحاول (تموت) يا أخوانا !!
▪️رد عليهو واحد: إنت عارف تكاليف (العزاء) عملت كم ولا بتتكلم (ساى) ؟!
▪️سيخرج (الفلول وفلولهم) يوم غدٍ (السبت) زاحفين فى مسيرتهم لعدم (السقوط) وبِحلم (العودة للحكم) من جديد سيخرجون لأجل ناعم المصالحة و(الهبوط) وخوف السقوط !!
▪️غدا السبت (سيزحفون) بزحفهم المحشود والمشحود مكبرين ومهللين وهاتفين هى لله هى لله لا للسلطة ولا للجاه ولا لدنيا قد عملنا وذلك لحماية الثورة من (السرقه) لأنها فشلت فى تحقيق (أهدافها) بإسقاط نظامهم (هم ذاتهم) وتفكيكهم وازالة تمكينهم (هم ذاتهم) والقصاص لدماء الشهداء (الكتلوهم) هم ذاتهم (نفس الزول) !!
▪️غدا السبت سيحشدون ويستنفرون فلولهم وارزقيتهم والبسطاء من طلاب الخلاوى و و و و و و “من كُلِّ كَوزٍ (عَميق)” !!
▪️ ولكن يوم (21/ إكتوبر) (الأخضر) القادم اذا البلاد سلمت من (أذاهم وخبيث مخططاتهم) وعبرت وانتصرت حيكون فى (كلام تااانى) للثورة والثوار (الصحى صحى) ثوار أحرار واللا مشحودين ولا ارزقية ولا (محشودين) ولا فلول ولا (فِلول الفُلول) !!
♦️ كسرة
▪️ حمدووووك عندو كلام (اليوم) المساء بحسب ما ورد فى الأنباء سيخاطب خلاله الاُمة واليوم دا كان جمعة … فهل سيكون كلامو (بداية النهاية) وسيكون خطابه الأخير ولا حيكووون عندووو كلام تااانى ؟!