الأخبار

شاب سوداني اقنع منصة (كورسيرا) لاعتماد الجواز السوداني كوثيقه معتمدة

1٬075

كتب دكتور وجدى وقيع الله على منصة لينكودين بأن (الشاب ريان عبد الرحمن عمل انجاز عظيم للسودان ظل يلاحق منصة Coursera التعليمية لاتاحة كامل خدماتها فى السودان وقبول الجواز السوداني كإثبات شخصية وقدم كل المستندات المؤيدة لرفع الحظر وأخيرا نجحت مجهوداته من اقناعهم لاتاحة كافة الخدمات للسودانيين. تهانينا للشعب التواق للمعرفه والتطور المهني) .

تجربتي مع كورسيرا بدت بكورس تحليل البيانات من شركة قوقل. قدمت عبر كورسيرا لمنحة وكورسيرا وافقت علي المنحة بعد 15 يوم. المهم بديت الدراسة ووقفت شغل بقيت ادرس اكتر من 10 ساعات في اليوم الواحد.

لما خلصت الكورس الاول، طلبوا مني اعمل اثبات للهوية, بديت في الخطوات ولما اخترت السودان تم الرفض, المهم اتواصلت مع كورسيرا, صراحة كانوا سريعين في الرد وفهموا الحاصل لكن كانت الصدمة لما قالوا انت في بلد مابنقدر نعمل لك حاجة, المهم انا طلبت اتواصل عبر الايميل لتوضيح بعض النقاط المستجدة بخصوص السودان والخزانة الامريكية.

يلا خلوني اشرح ليكم شكل العقوبات المفروضة علي السودان من ناحية تقنية, في نوعين من العقوبات الاولي عقوبات الكونجرس الامريكيوالتانية عقوبات من الرئيس الامريكي, عقوبات الكونجرس مابرفعا الا الكونجرس, اما الرئيس عندو صلاحيات تسمي الامر التنفيذي. يلا اوباما عندو امرتنفيذي لتخفيف العقوبات عن السودان , وكذلك ترمب.

اما عقوبات الكونجرس لسا موجودة, عشان كدة لسا الموضوع معقد ومحتاج مجهود عشان نستفيد من الاوامر التنفيذية, وفي حاجة تانية اسمها الرخصة العامة دي من صلاحيات الرئيس, وكمان في رخصة خاصة دي ممكن اي شركة امريكية تقدم ليها عبر الخزانة الامريكية اوفاك.

للشركات العلاقات بين الشركات الامريكية كمان معقدة , ناخد كورسيرا علي سبيل المثال. كورسيرا منصة بتقدم مواد تعليمية من مؤسسات امريكية وغير امريكية لكن بحكمها القانون الامريكي, بالنسبة لمشكتي مع اثبات الهوية كانت في يد الشركة الي بتتحقق من النهوية نيابة عن كورسيرا اسمها بيرسونا.

بعد تواصل مع كورسيرا لاكثر من شهرين نجحنا في اعتماد الجواز السوداني كوثيقة اثبات هوية, لكن دي البداية, لانو الكورس الي بدرس فيه تابع لقوقل ولازم استخدم في بي ان عشان ادرسه, ودا موضوع ما في يد كورسيرا, وكذلك تطبيق كورسيرا لايمكن تحميله داخل السودان لان الموضوع مربوط بقوقل.

ملخص الموضوع اذا قدرنا نخترق قوقل ,مايكروسوفت, ابل حرفيا بنكون قضينا علي 90 في المائة من العقوبات

https://licensing.ofac.treas.gov/Apply/Introduction.aspx

https://www.state.gov/u-s-relations-with-sudan/

https://home.treasury.gov/policy-issues/financial-sanctions/sanctions-programs-and-country-information/sudan-and-darfur-sanctions

المجهود جماعي ولولا اجتهادات الناس الي سبقوني ماكنت حاقدر اقنع كورسيرا لاعتماد الجواز السوداني كوثيقه معتمدة, لكن الطريق لسا طويل محتاجين نفعل كل خدمات كورسيرا في السودان وامكانية تحميل التطبيق في السودان . انا الان متواصل معاهم لكن بتمني نعمل حملة عشان الناس تسجل بالمنصة وتطلب من كورسيرا تقديم كل الخدمات للسودانيين.
مرة تانية بشكر كل الناس الي اتفاعلت وبتمني الجهود تتضامن , وكل ميسر لما خلق له
تحياتي

أكتب تعليقـكـ هنــا

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبول قراءة المزيد