(كان بدري عليك) – منتصر جادو

◾️ أهلاً …… حبيبه !!

حرفيا كدا فى مفردات كدا (بقت) تستخدم كنوع من الرُقي فى نظر الناس والله اعلم زي عنوان البوست دا (حرفيا كدا) و كلمة (حبيبة ) (بستخدمنها) البنات مع بعضهن لما واحدة ترد علي رسالة ( سلام و تحية) جاتها من واحدة تانية فى نفس القروب وزولتنا دي ترد عليها ب( اهلاً حبيبة) بصوت البنات البعطشو الجيم أها طوالي بتذكر رد ( مصطفي) من اولاد حلتنا كان عندو خِلاف قديم ومتجدد مع اول الفصل وقتها مصعب ابراهيم (كِشك) مصعب زول مُهذب بطبعو جا ماري فينا قبل طابور الصباح وكان مصطفي معانا قاعدين ومدورين جوطة فى الكورة وغلبناكم وغلبتونا ، صعوبي بصوت جهور قال لينا السلام عليكم و رحمة الله، اول زول رد ليهو كان مصطفي قال ليهو ( سًلًت عَين ب عَتلة)،

زمن الغتتة والدسديس دا من زمان منتهي عندنا كلمة ايجابية برضو ظاهرة في المشهد، ومرة من المرات في قصة في كتاب المطالعة زمان دروسنا ليها كنوع من نشر الايجابية، بتحكي عن طفل كسًر ليهو صحن قزاز في المطبخ اُمه كانت ما موجودة فى البيت لما جات قام حكي ليها بالحصل، قالت ليهو فداك وقامت حفزته بحلاوة وكان درس بليغ لينا انو كيف نتعلم الصدق والشجاعة ونكون ايجابين

ويا سبحان الله في نفس اليوم دا أنا كسرت أكبر صحن في البيت بدون قصد، أمي كانت عند الجيران المهم بعد رجعت من الجيران مشيت حسب بالمنهج الدرسونا ليهو في المدرسة وبصوت مكسور نظام (عاطفة وحنان يا ناس ) قلت ليها يا امي كنت فى المطبخ وبدون ما اقصد، كسرت الصحن الابيض الكبير داك فجاة اسمع ليك اوبعلي كسرت لي شنو ؟ وبعدها عينك ما تشوف الا النور وجنس خبت وكواريك (انا اعَمر وانتوا تكسروا لي – يكسر شنو الليلة اقول ليك)، وانا والله ببكي وقدامي صورة الاستاذ فى الفصل وكمية زعل عليهو الله يسامحو

▪️كسرة
كل ما اشوف خالد سلك فى التلفزيون بتذكر الاستاذ والمنهج.

▪️حرية – سلام – عدالة والثورة خيار الشعب .