(كان بدري عليك) – منتصر جادو

0 62


▪️فى مفردات جديدة كدا فى قاموس لهجتنا ما متأكد من المعني المقصود بيها شنو, لكن خيالى بوديني لمعني من الذاكرة و بجيب ل موقف كمثال حي , يعني مثلا كلمة (حبيبة ) , لما واحدة من البنات ترد علي رسالة ( سلام و تحية) جاتها من واحدة تانية فى نفس القروب , و زولتنا دي ترد عليها ب ( اهلاً حبيبة) , أها طوالي بتذكر رد ( مصطفي) من اولاد (ود مصري) كان فى خلاف عميق كدا فى اليوم القبليهو مع مصعب ابراهيم (كِشك) , مصعب زول مُهذب بطبعو , جا ماري فينا و كان مصطفي معانا قاعدين كدا قبل طابور الصباح و قال السلام عليكم , اول زول رد ليهو كان مصطفي قال ليهو ( سًلًت عَين ب عَتلة).
كلمة ( إيجابية ) قابلتني كتير جداً في الشّارع , وين يا إيجابي وفي المواصلات إيجابي , و العجب نواعم بلدنا بموتوا في الإيجابية و كمان لما يعطشوا ليك الجيم دي ,كمية الإيجابية في البوست دا ( خُراااافية ) .
▪️مرة من المرات في قصة في كتاب المطالعة زمان دروسنا بتحكي عن طفل كسًر ليهو صحن قزاز في المطبخ , اُمه كانت ما في لما جات , قام حكي ليها بالحصل , قامت حفزته كنوع من الإيجابية , و كان درس بليغ لينا انو كيف نتعلم الصدق و الشجاعة. وسبحان الله ربنا أراد يختبرني ولا يختبر المنهج ولا الأستاذ ما عارف , المهم أنا كسرت أكبر صحن في البيت بدون قصد والله وأمي كانت ما في , مشت ناس خالتي (فاطمة حمد) الله يطراها بالخير , وانا لحظتها خاشي فى نزاع نفسي رهيب , إحساسي بقول ل شي , و المنهج والاستاذ والقصة الخرافية بقولوا شي عكس إحساسي .المهم مشيت بالمنهج , والوالدة جات وقمت مشيت كلمتها قلت ليها يا إمي انا كسرت , قبل ما اكلمها إنو انا كسرت شنو؟! , قالت لي يكسر راسك كسرت لي شنو ؟ وأخدت لي دقة عمري ما اخدتها , اتاري سواقة الخلا دى من زمااان .

? كسرة
▪️ بالنسبة لمفردة (البَتّة ) قابلتنا فى الروضة زمان تقريبا كانت نشيد (كان فى “بَتّة” نطَّت نطه)

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبول قراءة المزيد