( كَانْ بدرِى علْيك) … يحلّها الشربكها.. منتصر جادو

2 138

يحلها الشربكا …!!

يا سلام لما العلاقة الاسرية تكون مبنية على الترابط , المجتمع ذاتو بكون مستقر وجميل والدنيا حلوة . قال تعالى :
(وَمِنْ آيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجًا لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةً ۚ إِنَّ فِي ذَٰلِكَ لَآيَاتٍ لِقَوْمٍ يَتَفَكَّرُونَ ).

مؤسف جدا تسمع عن اتنين اعلنوا عدم قدرتهم عن استمرار الحياة بيناتهم (ابغض الحلال), ودايما في مجتمعنا الشماعة هى سببين :
▪️السبب الاول : (تدخل الاهل من الطرفين ) .
وجهة نظرى الشخصية دى اسباب وهمية , الحياة الخاصة بتفضل خاصة وانتوا يا (الزوجين) ابقوا حريصين على حياتكم وعشان ما يكون في تدخل خارجى , التدخل الخارجى بكون الضرب عشوائى من طرف وبكون حسب طبيعة العلاقة والحسابات بتبدا من الخطوبة و يا ويلكم انتوا اصحاب الوجعة و الله يوم الحساب بس ( شبابك فيما افنيته) , يطلعوا ليك قديم و جديد , اهل الزوجة بطلعوك انت من الاساس الخيار الخطأ واهل الزوج يطلعوكِ انتى سبب كل البلاوى يقولوا وياريييت لو ولدنا عرس فلانة الهدية والرضية , اها اخير كدا, وبعد داك بنبقى في ( يحلها الشربكها ) .
ويا سادة (الزوج و الزوجة) انتوا الوحدين المسؤولين عن المحافظة على استقرار واستمرار حياتكم الزوجية و اقرب الاقربين ما بصلح يكون طرف تالت في علاقتكم , عليكم الله ابقوا قدر المسؤولية .
ونصيحة لناس التدخل الخارجى ( الاهل من الطرفين ) عشان الجماعة الفوق ديل ما يعملوكم شماعة خلونا دايما نتزكر قول الرسول علية افضل الصلوات و السلام ( من حسن إسلام المرء تركة ما لا يعنية ), خلونا نرسم حدود الخصوصية و احترامها يبناتنا واى زول يركز في ورقته .

▪️السبب التانى : ( قلة الرومانسية )
دا سبب جديد طالع موضة الايام دى , زمان كنا بنسمع ( قلة الأدب ) , و عاملين حساب كويس ما نكون قليلين ادب , اها اسى نتيجة لعوامل التكنولوجيا الحديثة , ظهر السبب دا (قلة الرومانسية), زوجى ما رومانسى معاه كعوجة خشم او زوجتى ما رومانسية و اليدين جوة الجيب و الحاجب اليمين مرفوع لفوق ما عارف السر شنو غايتو), ( الطرفين ) بعانوا من قلة الرومانسية حمنا الله و اياكم ?. حقوا قبال اى مشهد رومانسى في اي مسلسل او فلم يكتبوا لينا تنبية هام:
( إن الرومانسية التى تشاهدها في الحلقة نفذت على يد محترفين و ننصح بعدم استخدامها بالمنزل ) , الله يجازى الكان السبب. يا ناس نحن الرومانسية الاتربينا عليها :
▪️رومانسيتنا في صرة القروش لمن يفكوها من طرف التوب و تسلمها امك لابوك عشان ابوك يقدر يلحق الشغل , و وراها دعواة بالفرج و تطمينات بان اها كلها يومين و المرتب ينزل .
▪️رومانسيتنا في لمتنا في صينية الغداء و ابوك يشكر في طبيخ امك وامك تشيل العضم الكبير الكنت قافل عليهو يختو قدام ابوك و معاه ( اكل يا حاج اكلك كعب الايام دى ) سنه يا انا.
▪️رومانسيتنا في اهتمامهم بصلاتنا في ميعادها و دعواتهم لينا بالتوفيق.
▪️رومانسيتنا في تقاسمهم لهموم تربيتنا و غرز القيم النبيلة .
▪️رومانسيتنا في تقبلهم لبعضهم بكل عيوبهم .
دى الرومانسية القمنا عليها و ياها البنعرفها .

▪️كسرة

ﻭﺃﺟﻴﻚ ﺑﻰ ﻗﺪﺭﺗﻰ ﺍﻟﺒﺎﻗﻴﺔ
ﺣﻄﺎﻡ ﺇﻧﺴﺎﻥ ﻣﻮﺳّﻢ ﺑﻰ ﺷﻘﺎ ﺍﻟﺪﻧﻴﺎ
ﻭﻣﻘﺴّﻢ ﻗﻠﺒﻮ ﻓﻰ ﺍﻷﺣﺰﺍﻥ
ﺃﺟﻴﻚ ﻓﻨﺎﻥ
ﺃﺷﺪ ﺃﻭﺗﺎﺭﻯ .. ﻭﺃﺣﻜﻴﻠﻚ
ﺣﻜﺎﻳﺔ ﺇﻧﺴﺎﻥ ﻭﻫﺐ ﻟﻰ ﺳﻜﺘﻚ ﻧﻔﺴﻮ
ﻭﺭﺳﻢ ﺻﻮﺭﺗﻚ ﻋﻠﻰ ﺣﺴّﻮ
ﻭﺭﺑﻂ ﺳﺎﻋﺪ ﻋﻠﻰ ﺍﻟﻤﺠﺪﺍﻑ
ﻭﻗﺎﻝ ﻳﺎ ﺇﻧﺘﻰ ﻳﺎ ﺃﻏﺮﻕ

2 تعليقات
  1. معتز على محمد يقول

    الرائع ويتا دائما تبادر إلى معالجة المشاكل الاجتماعية بأسلوب جميل وبسيط سلس ممزوجا بحروفك وكلماتك المرحة وسردك الممتع
    جزاك الله خيرا ودمت ودام يراعك

  2. […] ▪️ كان بدرى عليك – (دّق العيش) – منتصر جادُو !! […]

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبول قراءة المزيد