من الأسافير .. المطرة صابة وين ؟!
▪️كل بلاد الدنيا لمن تنزل عندهم المطرة بيكونوا عارفنها وذلك من خلال متابعتهم لنشرة الارصاد الجوى والتوقعات المناخية وموجز أحوال الطقس ومعدلات درجات الحرارة الصغرى والكبري والواحد فيهم بيكون عارف المطرة (صابة وين)؟! ومتين وعارفها كمان ستكون مصحوبة بزوابع رعدية ولا مصحوبة باتربة وغبار عالق بس !! وتبعا للمعرفة دى بتلقاهم عاملين احتياطاتهم اللازمة والضرورية والواحد فيهم بيكون لابس لبس المطرة وشايل مظلتو فى يدو وجاهز (موية ونور) للتقلبات المناخية .
• الا عندنا المطرة بتجى فجأة ودون سابق إنذار وزى القضاء والقدر وبتفاجئ لينا (الولاية) والحكومه وبتهزم كل استعداداتها وعادى جدا المطرة (تدقك) وانت فى نص السوق العربى وتلقى الجميع رافعين بناطلينهم وسراويلهم يهرولون للاختباء من (البل) !!
• وطيلة فترة حياتى الخريفية ما لاقانى زول ماشى والمطرة صابة والمظلة فى (راسو) !! وما ان تنتهى المطرة الا وتبدأ مسابقات الجمباز والاكروبات و(التنطيط) فى الحجار واللساتك و(مباراة) الحِيط وتبدأ عملية الخواضة فى الطين خاصة للمسئولين وذلك لتفقد المتضررين كل (خريف) • الأمطار بتكون أمطار (خير وبركة) على المناطق الزراعية والرعوية وبتكون كارثة حقيقيه للحكومات الفاشلة فى الإستعدادات لمجابهة موسم الخريف والفيضانات وبدل يكون الخريف (أجمل) فصول السنة (زى ما درسونا فى الإبتدائي) يتحول الخريف إلى مأساة ومعاناة حيث لا مجارى ولا مصارف ولا يحزنون وتتحول العاصمة إلى بركة آسنة ومرتع خصب للذباب والبعوض والضفادع !!
• من أسه كلمتكم جهزوا مظلاتكم وأفتحوا مجاريكم و(سبلوقاتكم) لمجابهة موسم الأمطار هذا العام والتى أفادت التوقعات الإرصاديه بأنها ستكون غير مسبوقة ويعقبها فيضان يقضى على (الأخضر واليابس).
