الشباب ومخدر الآيس .. أفيقوا يا حكومة أفيقوا يا شباب !!
من الأسافير
النداء الاخير – محمد يحيى أبوضلع
الشباب ومخدر الآيس
مخدر الآيس ليس هو المسمى الوحيد المنتشر بين تجار الكيف قد يطلقون عليه اسماء عديدة مثل الكريستال – والشابو ومكوناته عبارة عن مسحوق أو بلورات ويتعاطى عن طريق الشم وله مسميات اخرى
(الكريستال والميث والشبو)
ويعرف ايضا بالشيطان_القاتل (دا لا بنقو لا كوكايين لا ترامادول لا كحول). لالالالا، دا حاجة تانية خالص دا آتى من حيث انتهى الآخرون، يعني شنو؟ يعني لو دخل الجسم بنتهي منك سريع..
لما فجآة نسمع بشباب زي الورد ماتو فجآة وما بيكون في سبب واضح ومعروف فديل اغلبهم مدمنين الآيس من آخطر انواع المخدرات وانتشر بصورة كبيرة جدا وسط الشباب يعني حاجة مخيفة شديد ومرعبة ومحتاجة وقفة كبيرة مننا
وبتم آخذ الآيس عن طريق حبوب وبودرة وتدخين وحقن.. الحقن بتاعة الانسولين عشان الناس تكون منتبهة و طبعا البياخدو بالحقن بكونوا في احتمال انو يصابوا بفايروس ال HIV والفيروسات الكبدية الوبائية
يا جماعة السم دا بشتغل سريع شديد في الجسم لانو بعمل على تحفيز الجهاز العصبي يعني ممكن من اول مرة الزول يدمن عليهو بخلي الواحد كدة مبسوط وطاير في السماء وتلقاهو بضحك في اقل حاجة بكون في حالة يقظة وصحيان ممكن الواحد يومين تلاتة عينو ما تغمض وبيكون في حالة نشاط عالي ومافي تعب، بكون في فقدان تام للشهية وبظهر سريع في صحتو، تآكل و تحلل في الاسنان..
من اول جرعة الجسم بكون محتاج لجرعات تانية.. وعلى فكرة بيآخدوهو بنات وآولاد واكتر الموزعين ليهو بنااااات
واثارو النفسية اكتئاب و قلق وأعراض ذهانية وهلاوس سمعية وبصرية (بارانويا) ونوبات صرع وضعف في الذاكرة وسلوك عدواني وعنيف (يعني ممكن يضرب امو وابوهو عادي).
الآيس حسب وجهة نظري انا ما عندو اي علاقة بالمقولات دي عشان نبني على اساسها انو الواحد ممكن ما يقرب ليهو و لا
دي اسرة محافظة
دي اسرة متدينة
ابوهو امام جامع
دي اسرة معروفة وناس كويسين
دي اسرة مفككة وسمعتهم بطالة
دي اسرة وضعهم الاقتصادي كويس
وفي بعض الاشخاص بيتعاطوه عن طريق التدخين أو عن طريق الوريد ومفعولها على الجسم خطير للغاية قد يزيد نبضات القلب بشكل كبير كما يزيد من الرغبه في العلاقه الجنسيه كما يحدث أيضا فقدان الشهيه بشكل كبير مع الأعراض النفسية مثل الاكتئاب والقلق مع الاحساس بالرغبة في العزلة ..
ويبقي السوال قائما من أين جاء مخدر الآيس وكيف دخل إلى السودان وكيف يوزع للشباب وما موقف الحكومة من ذلك ؟؟ افيقوا يا حكومه افيقوا يا شباب
