زالنجي: مواطن يزرع الكاكاو .. إليك التفاصيل …
بقلم هادي ود البورت
محمد عبدالله الشهير ببقاري من مدينة زالنجي – حي كنجومية (راج في الفيس أنو زرع كاكاو) أتواصلت معاهو وكانت افاداته على النحو التالي :-
الزراعة ممكن شتل أو من خلال البذرة وفي الحالتين بتدي نتيجة كويسة
الشجرة بتحتاج لتلات سنوات زراعة حتى تثمر .. وتحتاج لمياه وفيرة “هي شجرة استوائية “
الشجرة تثمر طوال العام حسب أفادته طالما تصلها الماء بإنتظام وتثمر حتى في الساق كما واضح في الصور
افاد بقاري بأن الشجرة (وصلتو عن طريق صديق وزميل أسمو بنجامين من غانا اشتغل معاهو في اليوناميد وعلمو كيف يزرعو الكلام ده كان في 2010 ومن الوكت داك بقى خبرة في زراعتها وعندو منها 4 شجرات كبيرة في البيت)
(الثمرة كما ظاهرة حاجة زي القونقليز فيها حبوب داخلية وهي ياها حبوب الشكولاته بين 25 إلي 70 حبة البجفوفها ناس غرب افريقيا وببيعوها بالطن) – (صادرات غانا منها حوالي 1.8مليار – ساحل العاج 3.8 مليار)
قال (هو بقى خبرة فيها شغال يكاثر فيها وعندو منها شتول) – كما تظهر الصور
هو مُصر على أنو الكاكاو بتعامل معاهو زي البن بفتح الثمرة بتديك رائحة نفاذة وجميلة و حتى من جوه فيها شعيرات زي القرع فيها مادة عسلية حلوة وثم تطلع الحبوب الفيها (بين 25 إلي 70) وتجففها وتقليها وتسحنها زي البن قال تشربها مع اللبن تديك شاي كاكاو قوامو تقيل وحاجة عجيبة
بقاري بيعتقد الكاكاو ممكن يكون إضافة كبيرة للإقتصاد للمجتمعات القروية في مناطق السافنا المطيرة والرطوبة العالية زي جنوب النيل الأزرق وجنوب كردفان ومنطقة جبل مرة خصوصا الأشجار ما عايزة عناية كتيرة وبتنجح زرعاتها بدون أهتمام كبير
عموما ينتظر أن يرد على الناس في التعليقات وده حسابه
https://www.facebook.com/mohammed.abdallah.14811
واحدة من أخطاء الحكومة الفاتت إنها توسعت وحفزت زراعة المنقة دون أن تكون هناك بنية تحتية مصاحبة للتخزين والمعالجة أو حتى أماكن تهيئة التصدير والشحن المناسبة ومما افرز واقع مرير حاليا على المنتجين من فوائض الأنتاج في الوكت القرروا فيه زراعة المانجو نفس التجربة مرت بيها مالي وبدت بتقليص مساحات المنقة مقابل الكاجو (الشجرتين من نفس الجنس) تجارب التحويل من منقة لكاجو جربتها دول عديدة في شرق اسيا في التمانينات والتسعينات
الأشجار مثل الكاجو والكاكاو والبن ما عايزة بيئة حفظ أو معالجة كبيرة وكهرباء وتبريد وثمارها تقعد جافة لشهور وحتى سنين وهي تباع خام كما يحصل في كل الدول الأفريقية المنتجة وهي تحتاج (معالجة أهلية وتشغل ناس كتير وبعدين ممكن تبيعها كخام زيها وزي الفول السوداني والقنقليز والسمسم والصمغ) (الكلام ده طبعاً كمرحلة بعدين نفس النواشف دي ممكن يتم معالجتها وعندها قيمة مضافة محترمة)
أشهر دولة بتعالج الكاكاو هي بلجيكيا في ناس أول من شافت الكاكاو طوالي راسها مشى على النوتيلا لصقت ليها علب نويتلا في بوستاتها (فاكرة النوتويلا كلها كاكاو) .
طبعا الكاكاو بيطغى على كل المركبات التانية زي زبدة البندق أو الفول السودان و الصويا وغيرها وأغلب المركب طبعاً السكر – في النويتلا الكاكاو 07% وفي البراندات التانية من الشوكلاته بنفس النسبة أو أقل نتمنى من شركة زادنا (زي ما أتشابت ايام البشير ووسعت زراعة المنقة تشوف لينا أنسجة للكاكاو والكاجو)
