كردفان الغرة ام خيرا جوه و بره
بقلم : د.فيصل الزبير
علي المستوي الشخصي كررت كثيرا انني من عشاق كردفان الكبري و خاصة غربها حيث تعتبر الولاية الاولي في الضان في السودان وهو من سلالة الحمري وما احلي شواء الضان في زريبة المواشي في النهود او في غبيش او في محجر الخوي و شواء الابل كذلك وهي ولاية البترول والصمغ العربي والكركدي او الانقارا وما احلي منها
عاصمتها رجل الفولة بموقعها الجغرافي المميز ومن مدنها ابو زبد وصقع الجمل وود بندا وبابنوسه وخماس الدونكي وكدام ومن قراها في طريق النهود غبيش حمير الوالي وهي اهم محطه تقع منتصف الطريق وما احلي شاي العشاء فيها وود قاسم فيها الحمام باسم والضريس وام صدير وافرنجي وما تجمله الدوانكي وهي مكان شرب الماء للانسان والحيوان ودوما يكون موقع سياحي وفيه مشتل الفواكه ويمثل واحة الزائرين.
عشقتها لاهلها الطيبون من قبايل الحمر اصحاب الكرم والطيبه والمسيريه اهل الفروسية وقبايل اخري متنوعه وبطون متعدده.
ما احلي عاصمة غرب كردفان النهود بتاريخها العريض ومساجدها ومن لم يتناول لحمة الاقاشي في محل بوش لم يذق للمتعة طريق وزرتها عشرات عشرات المرات وكل مره اجدها متطورة للامام وحفظ الله كردفان الكبري وانسانها الطيب المسالم الهاش الباش
وكان ارتباطي بهذه الولايه بسبب السفر كاستاذ زاير بكلية الطب البيطري في جامعة غرب كردفان ومقرها مدينة غبيش الجميله ومن هنا احي كل لزملاء في جامعة غرب كردفان الذين جمعتنا معهم الصدف في مدينة غبيش دكتور عبد الرحمن نورمال ود إبراهيم يوسف وب.دشاش و د.عرديب و دكتور يونس والزملاء في مدينة الخوي علي راسهم ب حسيب عميد الكليه ودكتور عمر بشاره ود.راشد و د.ايمن ود.محمد حسين وكل العاملين بكلية الانتاج الحيواني هناك ودوما يضعوننا في حباب عيونهم في طلعونا ونزولنا في مدينة النهود
والتحية لأسرة كلية الطب البيطري في جامعة غرب كردفان ولكل اساتذتها والعاملين بها وعميدها د.عبد الباقي ود.مهدي ود.بريمه رد الله غربته ود.ابو الحسن ود.جماع ود.إبراهيم التميت ودكتور منتصر البدوي ودكتور يعقوب و د.خريف و الامير عبد القادر واسرته وعذرا لكل من سقط اسمه سهوا والي العم سليمان والعم ميدو وسعادة الصول والي رواد مسجد غبيش العتيق والمسجد المجاور للسكن والخاله عفاف التي تقدم خدماتها للطلاب بكل طيب خاطر وبلهجه اهل كردفان المحببه وكم تناولنا عندها عصيدة الدخن والكول .
اما محل الخاله ام ردوم له طقم ومذاق اخر في سوق غبيش، انه عالم ثاني وشربنا الحسوة والقضيم في نهارات غبيش الغايظة وتناولنا بطيخها الحلو في مواسم الحصاد والتحيه لسوق النسوان في غبيش وسوق المصنوعات الجلديه ومحلات العسل الاصلي وزريبة المواشي بحصينها الجميله وإبلها الشامخه وحميرها التي تصنع الفارق لما تقدمه من خدمات جليله لسكان المنطقه.
وحضرنا رقصة الحصاد الاشهر في بوادي كردفان وهي الكدندايه تؤدي بالرقص المشارك بين النساء والرجال بين الكبار والصغار بالضرب عالي الارض بقوة بالارجل وما احلي ليالي غرب كردفان في موسم الحصاد نهاية كل عام
واسوق التحايا مثني وثلاث و رباع لمن للزملاء رفقاء الدرب من كلية الطب البيطري جامعة الخرطوم د .جلال ود .خير الله ود. خير السيد و د.عماد الدين والزملاء من جامعة بحري ب .شاديه وب.حيدر ود .قصي ود .نعمة ود.رشا واخونا والغالي د.محمد احمد حسن قرشي صاحب القفشات التي لا تمل وما احلي ما بصنع بيديه من طعام
ومن جانب اخر لا انسي زياراتي المتعددة والمتكررة لعاصمة الولاية السياسيه ارض المسيرية مدينة رجل الفولة واحدة من اجمل المدن السودانيه واكثرها نظافة واناقة واحي الزملاء بجامعة السلام وخاصة كلية الطب البيطري وعميدها الحالي د.ياسر طه ولكل اسرة الكلية واسرة جامعة السلام ودكتور بابكر ود.طارق ود.زهير و ب.احمد ودكتور كدام ود ابوالقاسم ود البحري والقائمة طويله ود فتحيه و د مستوره وكلهم من خريجي كلية الطب البيطري من غبيش صاروا رسل للسلام و المحبه و رتق النسيج الاجتماعي هناك
وما أجمل سوق الفوله وتناول شاي العصريه وتناول الاقاشي بالإمسيات وعندما اسافر هناك وفي بالي “سافروا ففي الاسفار خمسة فوائد” وانا اقول ان فوائد السفر الي تلك البقاع لا تحصي ولا تعد والشكر مثني و رباع لادارة كليه الطب البيطري بجامعة الخرطوم التي كانت تسهل من حركتنا حتي نغطي تلك الثغرات وخدمة للمجتمع بالمساهمة في تدريس تدريب طلاب وخريجي هذه الكليات الولائية والذين ذاع صيتهم في سوق العمل بالتميز في اداء مهمتهم في سوق العمل وفي الختام انا “مكتول هواك ي كردفان انا مكتول هواك من زمان”
د.فيصل الزبير – جامعة الخرطوم
ابريل ٢٠٢٢
