منتصر جادو – الداير يقع البحر قشّه ما تَعتِر ليهو !!
منتصر جادو ( كان بدري عليك )
عندي قريبي في (البلد) اختلف مع زوجتة وفي لحظة غضب وقع ابغض الحلال بينهم (شوفوا ابغض الحلال دي كيف )، لحدي هنا دي مشاكل عائليه مقدور عليها.
بعد كم يوم كدا كبار الاسرة سمعوا بالخلاف ودخلوا جودية، اقنعوا الراجل يمشي يرجعها، زول عاقل اقتنع ومشي معاهم .
اثناء ما هم قاعدين مع كبار اهل زوجتة في صالون الرجال ، كانت ام زوجتة بتتكلم بصوت عالي خارج الصالون في اشارة منها في ايصال صوتها لكل الحاضرين قالت (بتي دي لو رجعت للراجل دا انا حا اقع البحر )، رسايل واضحة في صندوق (قوي الحرية والتغير ).
كانت المشاورات وكلمات جبر الخواطر تجري علي قدم وساق بين الطرفين والامر شبة اتحسم بين الطرفين بانو خلاص (صافي يا لبن)، وفجاة كدا قريبنا دا استأذن وقال عندو كلمة صغيرة، قالوا ليهو اتفضل .
قال ليهم: انا ما عندي كلام كتير شكرا لوقفتكم معاي كلكم ، انا موافق ارجع المرا دي لكن والله ما بترجع معاي البيت الا (شهر تمانية) وشكرا .
طبعا في بلدنا هناك النهر موسمي وبسجل اعلي منسوب ليهو في الشهر التامن، وقريبنا دا كانت رسالته في صندوق ام زوجتة ( رئيس مجلس السيادة) انو زوجتي برجعها شهر تمانية ، لانو البحر بكون هايج والداير يقع البحر قشة ما تعتر ليهو.
كسرة: ود الفكي لرئاسة السيادي والداير يقع (البحر) قشة ما تعتر ليه.
