CallCenter221▪️
▪️ وزارة الصحة الولائية والإتحادية والقمسيون الطبي خدمة إستخراج شهادة التطعيم (بالكول سنتر)
▪️كلنا كنا بنستاء من منظر الزحمة قدام القمسيون الطبي، لكثرة المسافرين وقلة النوافذ المقدمة للخدمة.
▪️في وزارة الصحة – ولاية الخرطوم بالتنسيق مع الصحة الاتحادية والقمسيون الطبي أضافت خدمة استخراج شهادة تطعيم لقاح كوفيد١٩ مع خدمات الاستفسار عن كورونا، وبقى ممكن تقدم للشهادة بتاعتك وانت قاعد فـي بيتكم عبر الاتصال بالرقم 221 (وده خاص للاتطعموا داخل ولاية الخرطوم) على أمل إنو الرقم القومي تضاف ليهو الخدمة قريباً، وبتمشي بعد 24 ساعة للقمسيون الطبي “الرئاسة” زول استلام بس.
▪️الخطوات:
• تتصل على 221 .
• حتنتظر (5-10) دقايق للإجابة نظراً للمكالمات الكتيرة (وحتتم زيادة الكادر الشغال) لكن انت “ما تزهج” لحـدي ما يردوا عليك.
• حتمليهم الرقم الوطني بتاعك وحيتم التأكد بمطابقة الاسم.
•حيظهر ليهم في الشاشة طوالي إذا انت متطعم جرعة واحدة أو جرعتين .
• إذا انت اخذت الجرعة الثانية وقالوا ليك إنها ما ظاهرة فـي السيستم “ما تزهج” بس أرجع للحتة اللي اتطعمت فيها وقوليهم اتأكدوا إنكم دخلتوا بياناتي بصورة صحيحة.
٠ بعداك بيطبعوها وتمشي القمسيون الطبي “الرئاسة” زول استلام ساي تشيل شهادتك وتمشي.
• بيكون في باركود مع كل شهادة تطعيم مرتبط بموقع الوزارة الرسمي وأي زول ممكن يقراهو فـي أي مكان في العالم، عشان مافي زول يفكر يزوره
▪️ملاحظات
221 شغال 24 ساعـة في اليوم طوال الأسبوع بما فيهم الجمعة حتى القمسيون الطبي برضو
بالنسبة للناس العايزين يطلعوا شهاداتهم بالانجليزي حتتعمل قريب إن شاءالله عشان ما يضطروا يمشوا يترجموها
▪️السيستم ده لسة بيخضع للتطوير فياريت أي ملاحظة ممكن تكون مفيدة الناس تقولها عشان تضاف طوالي
▪️بنتمنى ليكم رحلة سعيدة وربنا يوفقكم محل ما قبلتو
