من الأسافير | كل ما الدعم يموت يشِيلُوه مِن القبر ويسلحُوه ويدُوه مُعسكر يا مَدِينَة !!

الدعم السريع طلع من الخرطوم وقاطع ذخائر ومتراجع في المواجهات الاخيره في الخرطوم ومشي لحدي مدني ١٨٩ كم و في وضح النهار ولا قوه ولا طيران اعترضه

انسحبت الفرقه الاولي من المعسكر بتاعها وخلت ليه الذخائر زي ما هي ما حاولت تدمر المخازن وهي منسحبه ودي استراتيجيه شغاله بيها كل الجيوش من الأزل نفس الحصل في الاحتياطي وجبل اولياء كل ما الدعم السريع يقطع ذخيره يسلحوه تاني

الاف الجنود والاف الشرطه والاف المستنفرين وتسليح وعتاد اكثر ومرتكزين داخل مدني وخارجها اختفوا فجاه والدعم دخل مدني ولا رصاصه ما اتضربت عليهم وهم عابرين الكبري بتاع الشرق

المدرعات قدر حي في مدني صمدت بالجنود بتاعتها ٩ اشهر وقضوا علي الاف الجنجويد المهاجمين وكذلك القياده العامه وسلاح الاشاره وسلاح المهندسين ووادي سيدنا والمعسكرات دي اتهاجمت بعشرات الالاف من الدعم السريع والاف السيارات القناليه وما سقط منها اي معسكر

مدني سقطت بي الف جنجويدي (جو) من الخرطوم راكبين لحدي ما دخلوا مدني وشالوا الذخائر واستولوا علي المدينه كانه في سابق اتفاق، كل ما الدعم يموت يشيلوه من القبر ويسلحوه ويدوه معسكر يا مدينة

القياده الفوق دي دايره الحرب تستمر البرهان داير السودان يكون مشتعل كده عشان يقعد في راس البلد والناس تنزح وتتشرد عشان نفسه، البرهان ما داير ينزل الاف الجنود للقتال وحابسهم في المعسكرات لانه كده اول شئ نهايه الجنجويد ونهايته شخصيا

المسرحيه بتاعت مدني دي اكبر دليل انه حكايه سقوط مدني ما قوه وحمره عين الموضوع قياده شغاله في اطاله امد الحرب، البرهان كان جزء من مخطط بعد الثورة ولمده اربعه سنين وسمح بتمدد الدعم السريع واداه معسكرات وتسليح ولكن المخطط ما كان عارف انه راسه هو اول راس حا يطير

حاليا البرهان ماسك العصا من النص لا نصر ولا هزيمه “بس الناس تقعد تتشرد كده بالسنين”.

• 6 نصائح لكِ لتحضير مستلزمات الام والطفل الضرورية
• لجنة أممية تحقق من صلات إماراتية بأسلحة في السودان
• تضارب التصريحات بين بنك الخرطوم وشركة «EBS» بشأن سحب أموال من العملاء
• البرهان: حربنا ضد “ميليشيا” الدعم السريع وليست ضد أي جنس أو قبيلة .. ولا يوجد من يُملي علينا من الإسلاميين
• قُلْ: ليتني شمعةٌ في الظلامْ؟!

محمد الكرونكي – (منقول من صفحته بالفيسبوك)