من الأسافيير – عقد عمل (إمام) مسجد !!

0 159

▪️حكى لي احد اصدقائي (الثقاة) قالي يا شيخنا انا كنت في دبي لي 5 سنة هناك وقال في جامع كده جنب الشركة حقتنا امامو صوتو جميل جدا جدا فبقيت اجي واصلي معاهو وشوية شوية المسجد بقى ممتلئ بالمصلين – اتعرفنا علي الشيخ طلع من أحد الدول العربية (الشقيقة) وساكن في عاصمتها – وادانا عنوانو – مرت كم سنة كده والأمام رجع بلدو نهائى – زميلي جاتو مأمورية للدولة الشقيقة ذاتها وقال وقت اصلا جاء هنا يصل الشيخ ده ويسلم عليهو – قال مشي المسجد صلي العصر – سأل الزول الجنبو قاليهو بيت فلان بن فلان وين ؟؟
وغريبة ليه ما شايفو في المسجد ده مش هو امام المسجد ده ؟؟ قام قال لي الزول ده (مسيحي) قلت ليهو يازول انا قاصد ليك (فلان بن فلان بن فلان) واديتو اسم الشيخ رباعي فقال والله الزول ده مسيحي قلت ليهو وصف لي بيتهم فوصف لي بيتو مشيت وطرقت الباب جاني (الشيخ) بشحمو ولحمو وبدون (دقنو) والكان بصلي بينا ذاتو وسلم علي، قلت ليهو انت مسيحي؟ قال لي ايوا مسيحي، ولقيتو معلق (صليبو) فى رقبتو، قلت ليهو كيف صليت بينا السنين دي كلها وانت مسيحي؟؟
رد لي وقال (جاني عقد بتاع امام مسجد في دبي براتب 10000 درهم ) كنت عاوزني أرفض العقد عشان انا مسيحي ؟؟

▪️كسرة

▪️واحد قابل إبليس قال ليهو يا (إبليس) ماشى عمرة ولا شنو؟!
▪️ابليس عاين ليهو كدة مسافة وقال ليهو: البلد دى انا تانى ما عندى قعاد فيها معاكم
▪️قال الكلام دا كيف يا (ابليسنا) ؟
▪️قال ليهو : الكوز اوسوس ليهو يسرق مرة ومرتين وتلاتين واوسوس ليهو يشترى عربية ويعرس سكرتيرتو فى السر واوسوس ليهو يبدأ يكون نفسو يقوم يهبر ليهو هبرة جامدة يشترى قطعة ارض ويبدأ يبنيها واوسوس ليهو يسرق يعمل الدور الاول والتانى ولمن يصل الخامس ويشطبها يكتب فوووووق فى عمارتو (هذا من فضل ربي) !!

▪️ الحقوا لجنة إزالة (التمكين) قبل (الكيزان) يخلوا ليهم (البلد) !!

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبول قراءة المزيد