كان بدري عليك – منتصر جادو
(كان بدري عليك) – منتصر جادو
ياسر مكتوم
فى حلتنا عندنا فردتنا زول لذيذ خلاص، ما عنده كنترول، متهور فى قرارته، طوالي قادي الشغل .. اسمه امين، ومرات مرات كمان بندلعو بنقول ليهو (مين). (مينو) دا يوم كدا وفي لحظة تجلي قال لي اول طعنة اتعرضت ليها فى حياتي دي كانت من نفسي انا تجاه نفسي طعنة جوة القلب
انا طبعا بحب القصص دي، استعدلت ليهو عديل فى القعدة وقلت ليهو معقول يا مينو !!
في زول بطعن قلبو ؟!
قال لي ااااي ودا انا ذاتو …
وقال كدا وفتح قلبه فى بوح خاص وحصري علي
(كان بدري عليك)…
قال لي عندنا بت جيرانا سمحة ومؤدبة ولطيفة ماخذها اعلي معدل فى التقيم من لجنة الحي الخاصة بتقيم معاير الجمال، غايتو معاير الجمال الزمان ديك بتختلف، بتنا المقصودة في قصتنا دي بمعاير الزمن دا بناديها بالصوت العالي يا (صبجة)- دي الصبجة جارتنا…
بت رقه ولطافه وظريفة جدا، علي لسان (مينو) كان الاعجاب سيد الموقف، بالرغم من انو مينو كان عارف الخطورة الامنية والمتعلقة ب اخوان البت، قال لي ناس عنف و دق بس ما عندهم اي تفاهم ….
قال لي انا قررت مسبقا انو (I will take the risk)، طبعا قال لي العبارة دي بلكنة اهلها، سنه يا (مينو) علي اتقان لغة الخواجات ذي ما قال الكتاب .
قال لي البت مناسبه معاي شديد، وانا وهي فى نفس السنه الدراسية، مقاسي بس …
المهم كنا ممتحنين ل تانيه (ثانوي) اتحايلت عليها بحنك ظريف كدا انو انا عاوز كتاب رياضيات منها، قال لي قابلتها وهي داخله علي الحِلة ….
لابسه الازرق السماوي الفاتح والطرحه البيضاء، من يوم شفتها بالالوان دي وانا بشجع الهلال (في السكة موج ازرق هدر – تاريخ ندر اسمو الهلال).
ادتني الكتاب وبترجف ادب وخوف وخجل، وقالت لي بعد تخلص منه، خت لي الكتاب فوق حيطة بيتنا قصاد الشجرة انا قبل انوم بجي اخده، وجرت جري شديد علي بيتهم …
قال لي انا مشيت فرحان فرح بالكتاب وقعدت فى الصالون وجبت الورقة والقلم نظام مجتهد فى المذاكرة وكدا …
قال لي فتحت الكتاب وفى اول صفحة فى الجهة الشمالية الغربية فووووق علي قول (الرشيد بدوي عبيد) مكتوب داخل قوس (ياسر مكتوم فى جوف اصداف) …
قال لي الدنيا ضلمت فى وشي، وحسيت بطعنة فى القلب، والشيطان شاطر قال لي البت دي بتحب واحد اسمه ياسر، وعشان ما تفكر كتير دا ياسر الدغور .
الشيطان فى اللحظة ديك جاب لي شكل ياسر، وهو لابس الاحمر شعار ناديهم وشارة الكابتن علي يده وكاريزما القيادة، ووقتها ياسر كان نجم الجيل …
قال لي قلت لي روحي ياخ انا ذاتي لا شبه ياسر واهلي لا مرطبين ذي ناس ياسر، انسي الفكرة ياخ….
وفي الليل داك رجعّت ليها الكتاب وكتبت ليها في ورقه ختيتها في اول صفحة، كتبت ليها فيها عبارة بالخط العريض قلت ليها (طز فيك وفي ياسر) .
قال لي الصباح في المدرسة، ناديت على صاحبي مهيد البدري، قلت يا مهيد ياخ انا وقعت فى مشكلة متعلقه بحب من طرف واحد وما عارف كيف الخلاص ؟!!!
قال لي العرفك شنو ياخ من طرف واحد، خليك متفائل ؟! هي كلمتك عديل ؟!!!
قلت ليهو ابدا ما كلمتني عديل، بس لقيتها كاتبه الكلام دا، و كلام واااضح ذي الشمس، قال لي انا كتبت كلامها بالحرف فى ورقة .. مهيد شال الورقة وقال لي كدي نشوف اسم حبيبها، وفجاءة مهيد بقي يضحك بصوت عااااالي جدا ..
قال لي ياخ ما تشوف قرايتك اخير ليك، قال حب قال !!، حب يخمكم انت وهي .. انت كمان عارف مهيد لما يلقي فيك فرصة، قال لي مينو الله يرضي عليك، البت فايتاك بمسافه كبيرة جدا، دي بتقرا لسيف الدين محمد صالح وبتسمع لمصطفي سيد احمد، دا من اجمل النصوص الغناها مصطفى:
ﻳﺎﺳﺮ ﻣﻜﺘﻮﻡ ﻓﻰ ﺟـﻮﻑ ﺃﺻﺪﺍﻑ
ﻓـﺘـﺸـﺖ ﻋﻠﻴﻚ ﺑﻘـﻠﻴﺐ ﻧﺰّﺍﻑ
ﻻ ﺧـﺒـﻴـﺮ ﻳـﻬـﺪﻯ … ﻻ ﺩﻟﻴﻞ
ﻭﺻّﺎﻑ
كسرة
كلمتي المست غرورك وفرقتنا ياحبيبي
مش خلاص كفرت عنها بتسهدي وبنحيبي
- السلطات بجنوب السودان تحتجز (122) سيارة منهوبة من السودان
- عودة شبكة (MTN) للعمل بالسودان اعتباراً من بداية شهر يونيو المقبل
- الجميل الفاضل يكتب: مصلان مقويان ضد قھر السلطة ومخاوف الحرب
- إهداء من مدارس د.ابو ذر الكودة للطلاب السودانيين بالقاهرة
- السودان .. بسبب الدولار .. فوضى في الأسواق والأسعار وحملات أمنية ضد التجار!
