يوميات علوب … بنات (الأماني)

يوميات علوب … بنات (الأماني)

الطيب عبد الماجد

في ناس كدا عندهم موهبة الدخول والخروج لي أي حتة وعندهم مفاتيح كدا بفتحو بيها أي مكان (حرامية مجتمع) …!! زي (أسعد) صاحبنا دا، (أسعد) دا كان لاقاك بديك إحساس إنو بعرفك لما إنت ذاتك تصدق ودي بتكون المرة الأولى…!

بخش بيت عرس ما بكون بعرف فيهو أي زول، بعد ساعة بكونوا البنات بسألوهو عن مفتاح المخزن الخاتين فيهو الحاجات وبحاسب في (التباخين) وهو داخل ومارق لن يساورك أدنى شك إنو أخو العروس لو ما خالا ودي بتكون تاني مره يشوفم !!

موهبة كدا، ياخ مره كدا في عرس كل ما يجي داخل بزغردو ليهو مابعرف ولازول، الغريبة ببشر، أها عندنا صاحبنا كدا إسمو (مجاهد)، ماشي يخطب ليهو واحدة كدا زميلتو في الجامعة وقصة حب وكلام زي دا، قالوا أهلها ديل سأااليين، وبتاعين جرجرة كدا ك وأمها دي زي شرانية كدا (زي للتخفيف) شرانية راسا عديل، طوالي لعب بالجوكر وكلم (أسعد) دا يمشي معاهو، أول حاجه (أسعد) دا جا (منجلخ) أكتر من العريس والجلابية والعمة والريحة يازووول يسووا كدي !!

دخلو ليك على أهل البت ديل وسلمو عليهم لما وصل أم العروس (أسعد) دا قال ليها يشهد الله قايلك العروس زولتك رقدت شاش إنتهى منها كلو كلو نشفا ختاها في جيبو دا …!! (دي خلاص حتصوت للعريس مغمتة) !!

وسلم على الباقين ديل، قالوا ليهو دا (طارق) أخو العروس الصغير إتخرج قرا (كمبيوتر وبيانات) قال ليهو إنت قريت المستقبل !! أها قول لي داير تشتغل هنا ولا بره السودان … ونحن جاهزين كلو عندي، الولد داير يقع على وشو

المهم أسعد (جغم) البيت كلو في أول هجمة وأخترق كل الدفاعات والحصون بقى هو والقون، طوالي قال يا أخوانا طبعاً إنتوا عارفين ونحن عارفين والله عارف نقرا الفاتحه بس ربنا يتمم ليهم على خير

والله التقول سحرم، فعلا اليدين دي كلها اترفعت زي المافي حاجة وقروا الفاتحة ومجاهد ما مصدق أم العروس الكانوا خايفين منها فكت ليها زغرودة زي الليل وطوييييله ماعرفناها ليها هي ولا لي بتها!!

المهم (أسعد) ممشي أمورو بقى زي (قوقل) أي زول برجع لي الحاجه الوحيده الغالباهو بت جيرانم إسمها (تسنيم) في بنات إسمهم ذاتو قصيدة زي (تسنيم) دي

اها تسنيم دي مكسرة (أسعد) دا مشهياهو العافية (الحقيقة الأسرة كلها مكسرانا كلنا) (كان وأخواتها)
لكن قدر ما حاول الإختراق البت دي بترجمو عارفاهو مستهبل وكضاب، وهو القصة دي بتزيدو زيادة، مجتهد معاهم جنس اجتهاد

أيام أزمة الغاز ديك بجي شايل ليهم انبوبتين مع بعض أم (تسنيم) دي تقرب تزغرد تشبكو ليك إنتا يا يابا تتبارك ما تتشارك يا جمل الشيل وعدال الميل ..!!

وتسنيم ولا بتتلفت تعاين لي، (تسنيم) كمان سماحة البنات عندها عيون أكبر من عيون البوتجاز (وبقت نارو غاز هوي جيبوهو لي) وطويلة فرسة شايلة (غمازة) واحدة في الشمال اليمين زلط سنار، لما تضحك زي البتأشر لافه، (أها دي ياها المفروض يسموها شريان الشمال) سمحة سماحة البت ولا نضمة لكن قطيمة خاصة مع أسعد دا اصلو ما قنع، هو طبعاً زي (النزلة) بمسك البيت كلو

لاحظ إنو عمك (التجاني) أبو تسنيم دي بحب الكورة طوالي سرق ليهو موقع كدا المهم بقى يجيب ليهو قناة الجزيرة دي البي ان سبورت bien (عمك إتشلا من الفرح) وأسعد خلاص سجلو في كشوفاتو، بدون مناسبة كدا يقول ليك (أسعد ود ممتاز) بقي يشوف (ميسي) لافي الملعب وأسعد لاعب على رونالدو اللافي البيت دا ….!!

(تسنيم) حست إنو أسعد دا عارض وبعتر ليها، بقت دايرة طريقة تخلي يقنع منها، إتفقت مع صاحبتا مجرمة كدا إسمها (شاهندا)

(شاهيندا) ذاتا ما ساهلة (قصارية) كدا لكن قرضة مافي بت إسمها (شاهندا) ما سمحة … حتى لو نص نص الإسم دا بضيف ..!!

المهم قالت لي (شاهندا) أنا دايراك توقعي لي (أسعد) دا مكرهني وعامل بحبني وإنتي زي ما عارفة (خالد) زميلنا جاي يتقدم لي !! العارض دا لو ما زحا بتكون في مشكله !! (خالد) دا أنا بعرفو زول مسكييين كدا ولابد، المساكين ديل أصلهم حظهم عالي، ولا بسكوها بتجيهم مدردقة في محلهم، تشوف الواحد تقول (الغنماية) تاكل عشا وهو بتعشى بي زي ناس (تسنيم) ديل كاتلين حيلم فوق راي
المهم (شاهندا) قبلت العرض!! لاقت ليك (أسعد) دا في الشارع قشطتو بي نظره كدا وضحكة (نص كلتش) خلتو يتهوزز ومشت طولي أصلو ما سألتو اكتفت بالعرض العسكري دا …!! (النسوان ديل كان قصدوك .. تتشهد بس)

يازول بقى يغني براهو ما خفيف كمان طوالي جرى (الفيس) رسل ليها رساله كتب ليها: (نور بيتنا وشارع بيتنا) ..!! وهي ما قصرت رسالت ليهو ديل (🌹🙏) زولك غمر …!!

كتب ليها يا (شاهندا) والله أنا من زمان داير أكلمك لكن كنت خايف منك …!! باغتتو بالضحكات دي، (وهو بي هناك داير يتشرط) وكتبت ليهو بعدها، ليييه يعني قالوا ليك عني بعبع (شوف بعبع دي) ناس (أمونة) بقولو سحار

واعقبتها بي (ياخ حرام عليك) ….!! أها (حرام عليك) دي بقى ما بشوف رسل ليها ديل ( 🥰🥰🥰 ) طوالي طقتو بي دي، غايتو ( مارك ) ذاتو ما مقصر لاعب معانا باص وخانة، هنا أسعد توفي اكلينيكياً …..!! طوالي جاب آخرو قال ليها ممكن اشوفك …!! رددت عليهو قالت ليهو …!! مممممممم …!! حسب! أها (ممممممم ) دي فقدتو سوايل ردا قال ليها .. حسب شنو ..!؟؟؟ قالت ليهو حسب صدقك ومشاعرك..!!

طوالي كتب الشيك، قال ليها ياخ انا (بحبك) من زمان بس كنت متردد ..! رسلت ليهو دي هي قاصدة المهمة انتهت …؟! وهو فهما أفكر !! قال ليها أخدي وقتك وردي علي وخلي بالك من نفسك (هياااااا الخلي بالك من نفسك)

ومشى نفسو فاتحة ناس (تسنيم) يقدل هو أصلًا بجيهم طوالي بسأل الناقص شنو ..!! والفي شنو ..!! عامل فيها ود البيت ..!

ناس (تسنيم) ديل تلاتة أخوات بس ماعندهم أخو ولد …!!
وزولك دا مركب المكنة دي ..!! اختها الكبيرة إسمها (حرم) ما تسمع الإسم دا سامنها على حبوبتا !!

(حرم) دي يوم عرسا الدموع الاتكبت في الحلة دي تستر ميت مش في سماحة (بتكتل) بس ياها (حرم) دي لما فيها دكتور طقاها عرسا ساقا انجلترا …!! الدكاترة ديل كمان عزالين عزل ما عرفتهم قروا طب ولا حب يعرسوا البنات السمحات ديل ويقول ليك الوقاية خير من العلاج ..!! بشيلوا الوقاية ويدونا العلاج !! وفيك علاج طبيبي ..

فضلت أختهم الصغيرة دي إسمها (سهيلة) ماشه في نفس الدرب
ظهرت مره في (التيك توك) شفع الحلة فجروه بالقلوب ناس تسنيم ديل غالباً أمهم دي اتوحمت علي (حديقة)

أها يازول عمك (التجاني) قال ليهو ما بتقصر يا ابني لكن القناة دي بقت ما بتجي بكونوا غيروا الشيفرة أبوها ماعارفا (بوكو) قايلو اشتراك ….!! المهم (تسنيم) جات مارقة من جوه ملفحة بي توب
أمها ومغسلة وشها بي موية تشبه اللمبة والخصل حايمة في الجبهة يشيلو ويدخلوها تحت التوب تاني تشرد، ناس (مودة) شردت تاني ما جات (ولازلت أذكر خصلة عربيدة فوق الجبين هل تذكرين) …

المهم قالت ليهو (شاهيندا) صحبتي قالت لي طرحت ليها بقى يبلع في ريقو، قالت لي أبوها الظاهر يا أبوي حنحتفل بي عرس أسعد قريباً، من هسا نجهز حالنا تستاهل والله كل خير يا أسعد !!

(شاهندا) ذاتا تستاهل بت تمام كلمتني قالت لي فاتحتها في الموضوع ربنا يتمم ليكم على ألف خير !!

يازول (أسعد) بقى بشرب في العصير زي البنزين وشعر إنو اتلعب أبوها قال ليهو ربنا يتمم ليك على خير تستاهل والله يابني كل خير إنت ود جدع .!! أها (مورينيو) زاتو باعك خم وصر طلع منهم ماخد 0/6 قال يحصل (شاهيندا) رسل ليها قال ليها أها إن شاءالله فكرتي

قال ليهو الظاهر وشك حلو علي خطوبتي يوم الخميس (شوف الدنيا لما تدقك) الحمامتين طارو في يوم واحد، إلا البطل ما بموت، (أسعد) ترك الفن واتجه للسياسة لقيتو ليك منزل ليهو صورة ووراها لافته كبييرة قاعد ليهو مع جماعة كدا مكتوب فيها، (ورشة عمل وقراءة في التسوية والإتفاق الإطاري) (والله دا الا إطار عربية القاعد فيهو أسعد دا) كاتب تحت نحن مع التسوية والاتفاق إذا استوعب توجهاتنا !! (متجهين وين يا البلال) …؟

أسعد دا أيام الثورة ديك مشى (أديس) قال الجوطة ما بتنفع معاهو برجع لما تنتهي، جابت ليها توجهات …!! منزل ليهو لقطة تانيه بهمس مع خواجه كدا،الجماعة قايلنوا السفير، جعفر قال لي دا كان مساعد (ريكاردو) مدرب الهلال استقر في السودان وبقي بسف ….!!
المشكله ماهنا المشكله في واحدين معلقين تحت، قدام يا راكز …

هو ما ركز مع شاهندا .!! خلو بالكم منو (أسعد) دا ممكن يطلع من أي حتة، (خالد) جا اتقدم لي (تسنيم) أدوهو في خمسه دقايق جا كاتل ضلو ناس خطوبة طوالي عقدو، ما قلت ليكم المساكين ديل كان قامو خطرين قالوا العرس في العيد

فتحت التلفزيون لقيت ليك (أسعد) مستضيفنو مع واحد كدا، البدلة والكرفته والحلاقة، قال نحن كقوى ثورة داعمين لي أي إتجاه يقود لأمن واستقرار البلد وبنفتكر إنو البديل موجود إذا حدث أي نوع من التماطل أو التجاوز ! أوعى البديل يكون (شاهيندا) بس ..!

الدنيا دي كان لاويتا بتلاويك وكان أديتها ما بتديك خليك زي ( خالد ) والنصيب راجيك ماتبقى أسعد سرج الكضب برميك !!

وشال تسنيم معاها حرم يا ناس القوز علينا ظلم، هو صحي يا ربي (شاهيندا) فعلاً خطبوها ولا اتفاق إطاري، الجفلن خلهن أقرع الواقفات !!

من الأسافير