شلاقة !!
د.عمر الهادى آدم
بين السادسة والسابعة من عمري، زارتنا قريبتنا وبنتها الصغيرة (قاعدة في الفيس وتقرا في كلامي) وكعادة الكبار مع الصغار أدونا قروش وقالوا لينا أمشوا الدكان أشتروا حلاوة..
ونحن ماشين نظام الولد بيونس في بت أهلو، قلت ليها: “انت عارفة انو سيد الدكان الماشين ليهو ده غشاش خلاص.. لكن انت ما تقولي كده”.. وقالت تمام.. ولكن ما أن وصلنا مسطبة الدكان حتى رفعت عقيرتها بالسؤال: ” يا عمر.. ده ياهو دكان الراجل الغشاش!”..
وهنا جذبني سيد الدكان و صرخ في وجهي: ” القال ليك أنا غشاش منو!!” قلت ليهو ده محمد أخوي .. وانا سامع الموضوع من امي بصراحة .. الظاهر بيعو كان غالي أو حاجة.. فدفعني سيد الدكان وصرخ: “أووع تعتب الدكان ده تاني.. فاهم !!” فو الله ما عتبته حتى رحلنا من رفاعة بعدها بسنة أو سنتين..
تذكرت القصة ووالي البحر الاحمر يخاطب الجماهير في حضرة الحميدتي أثناء زيارته أول أمس للميناء: “يا اخوانا حميدتي قال لينا الميناء ما حنديهو ولا نبيعو لي أي دولة .. لا للامارات لا غيرها”
فقاطعه حميدتي : “يا زول.. يا زول أنا ما ذكرت اسم دولة “
فكأني بالحميدتي يجذبه من ذراعه صارخاً: “تاني ما تعَتِّب الولاية دي ..”
